Aquarius ရင်ခုန်သံ(၁)

မိုးဆွေ အသက်(၂၈)နှစ်

          သူ့ဈာပနပြင်ဆင်ထားတာကိုကြည့်ရင်း မေ့ မျက်ဝန်းထဲက မျက်ရည်တွေကျလာသည်။ အနားမှာပါလာသော ခင်ပွန်းသည်ကိုတောင် အားမနာနိုင်။ မေ ငယ်စဉ်ကတည်းက တိတ်တခိုးချစ်ခဲ့ရသော မျက်ဝန်းစကားတွေနဲ့ပဲ အချစ်ကို သက်သေပြနိုင်ခဲ့သော ငယ်ချစ်ဦး၏ အသက်မဲ့ခန္ဓာကိုယ်ကြီးကိုပဲ မေ မမှိတ်မသုန်ကြည့်နေမိသည်။ မေ ဆိုးနွဲ့သမျှကို သည်းခံပေးခဲ့သော မေ၏ သူငယ်ချင်းကောင်လေးသည် လူ့လောကထဲမှာ (၂၈)နှစ်သာ နေသွားနိုင်ခဲ့သည်။ “ငမိုးရာ နင်အဲဒီကောင်မလေးကြောင့် အသက်ဆုံးရှုံးရတာ တန်လို့လားဟာ။” မေ တိတ်တိတ်လေးရေရွတ်နေမိသည်။ ကြည့်စမ်းပါဦး။ ဘာရောဂါကြီးကြီးမားမားမှမရှိဘဲ သူ့ချစ်သူကောင်မလေး မြတ်နိုး လက်ထပ်သွားတဲ့နေ့ကပဲ သူစိတ်ညစ်ညစ်နှင့် မိုးရေတွေထဲ ညကြီးမိုးချုပ် ဆိုင်ကယ်လျှောက်မောင်းရင်း  အအေးမိသွားသည်။ ဒါကို သူက ဆေးခန်းမသွား ဆေးမသောက်ဘဲ ပေပေတေတေနှင့် လျှောက်သွားနေသေးသည်။ အရင်က ပေပေတေတေ နေခဲ့တော့ သူအပြင်းဖျားချိန်မှာ ခံနိုင်ရည်နည်းပြီး  နှစ်ရက်မြောက် မနက် မိုးလင်းခါနီးလေးမှာပဲ အားလုံးကို တိတ်တဆိတ်နှုတ်ဆက်သွားကြောင်း ကျန်သူငယ်ချင်းတွေပြောပြလို့ မေသိလိုက်ရသည်။ သူ စိတ်ညစ်တဲ့အချိန်လုပ်တတ်တဲ့အပြုအမူက မိုးရေတွေထဲလျှောက်သွားတတ်တာပဲ။ ဟိုးငယ်စဉ်ကလေးဘဝကအတိုင်းပဲ။ ဘာမှမပြောင်းလဲသေးပါလား။ မေနဲ့ အဆက်အသွယ်ပြတ်နေသော နှစ်နှစ်ဆိုသည့်အတိုင်းအတာကာလအတွင်းမှာလဲ သူ့အမူအကျင့်တွေမပြောင်းလဲနိုင်သေးပါလား။

          သူနှင့် ငယ်စဉ်က ကျောင်းတက်ခဲ့ရသည့်အချိန်တွေကို လွမ်းဆွတ်သွားသည်။ ကျောင်းသားဘဝကတည်းက စာတော်သော သူ့အနားမှာ ကောင်မလေးတွေ ဝိုင်းဝိုင်းလည်နေခဲ့သည်။ သူက လူချစ်လူခင်လဲပေါများသည်။ ထိုဝိုင်းဝိုင်းလည်နေသော ကောင်မလေးတွေအားလုံးကို ဂရုမစိုက်ဘဲ မေ့အနားမှာသာ အဖြူရောင် နှောင်ကြိုးလေးအဖြစ် အမြဲရပ်တည်ခဲ့သည်။ မေ ခဏခဏစိတ်ဆိုးစိတ်ကောက်လုပ်တိုင်း သူ မျက်ရည်ကျခဲ့တာတွေ။ သူငယ်ချင်းတွေကြားမှာ သူ့ရဲ့ တိတ်တခိုးအချစ်ကို ရင်ခုန်ရင်း သူကလဲ ငွေကြေးဂုဏ်ရှိန်ထည်ဝါသော မေ့အသိုင်းအဝိုင်းကြောင့် မေ့အချစ်ကို မဆွတ်ခူးဘဲ အဖြူရောင်စည်းလေးအဖြစ်သာ ရပ်တည်ပေးခဲ့ရှာသည်။ မေ နှင့် သူ သည် တိတ်တခိုးချစ်သူတွေပဲ ဖြစ်ခဲ့ရသည်။ ဆယ်တန်းတစ်နှစ်လုံး မေ့ရဲ့ ဆိုးနွဲ့မှုတွေ အနိုင်ကျင့်မှုတွေကြောင့် ကျောင်းစာလုပ်ရမည့်အချိန် ကျောင်းစာမလုပ်နိုင်ဘဲ မေ့ကို ချော့နေရခြင်း၊ မေ့ကြောင့် မျက်ရည်ကျခြင်းတို့ဖြင့်သာ သူ့နေ့ရက်တွေကို ဖြတ်သန်းခဲ့ရသည်။ မေ နင့်နင့်သီးသီးပြောခဲ့တဲ့စကားတွေ အပြုအမူတွေကြောင့် သူမျက်ရည်ကျခဲ့ရသည်။ ဆယ်တန်းတစ်နှစ်တာပတ်လုံး မေ့ကြောင့် စိတ်ချမ်းသာခဲ့ရသည့်ရက်တွေက ခပ်ရှားရှားပါ။ အောင်စာရင်းထွက်တော့မှ မေ့အမှားကို မေသိလိုက်ရသည်။ မေက ဂုဏ်ထူး(၄)ဘာသာနဲ့ အောင်မြင်ခဲ့ပေမယ့် သူကတော့ ရိုးရိုးသာအောင်ခဲ့ရှာသည်။ စာလုပ်ရာမှာလဲ အင်မတန်စေ့စပ်သေချာသောကြောင့် ဆရာဆရာမတွေတောင် သူ့အဖြစ်ကို မယုံနိုင်ဖြစ်လို့။ သူ စာကောင်းကောင်း မကြည့်နိုင်ခဲ့တာ မေ့ကြောင့်ဆိုတာ မေပဲသိသည်။ အောင်စာရင်းထွက်ပြီးကတည်းက ကံကြမ္မာသည် မေနှင့်သူ့ကို ရှင်ခွဲခွဲပစ်လိုက်သည်။ အသက်မွေးဝမ်း ကျောင်းပညာရပ်ခြင်း မတူတော့သောကြောင့် မေတို့နှစ်ယောက်လျှောက်သောလမ်းမှာလဲ ဘယ်လိုမှ မတူနိုင်တော့ပါ။ သူ့ပညာရေးလမ်းကြောင်းပြောင်းသွားရခြင်း၏ အဓိက တရားခံမှာ မေဖြစ်နေ၍ မေ အခုထိ လိပ်ပြာမလုံချင်။ မေက ဆေးတက္ကသိုလ်ကို အောင်မြင်စွာတက်နိုင်ခဲ့ပေမယ့် သူကတော့ နည်းပညာကောလိပ်မှာ ပညာဆက်လက် ဆည်းပူးခဲ့သည်။ မတူညီသောလမ်းကို လျှောက်လှမ်းရင်း ရံဖန်ရံခါလေးတောင် မဆုံဖြစ်တော့သော မေတို့နှစ်ယောက်ဖြစ်ရပ်။ ရင်ထဲက အချစ်တွေကို ဖွင့်ဟဖော်ထုတ်ခြင်းမရှိသော သူ့အချစ်တွေကို တိတ်တခိုးငံ့လင့်ရင်း မေ အသက်(၂၆)နှစ်ပြည့်တော့ အိမ်က ပေးစားသောသူကို လက်ထပ်ခဲ့ရသည်။ မေ့ မင်္ဂလာဆောင်တုန်းကလဲ ရီဝေေ၀ သူ့မျက်ဝန်းတွေ။ ထိုအချိန်ကတည်းက သူသည် သူ့ချစ်သူကောင်မလေးနှင့် သိပ်အဆင်မပြေဟု သူငယ်ချင်းတွေဆီက ကြားရသည်။ သူစိတ်ညစ်ရင် ပေပေတေတေနှင့် ထမင်းမစားမသောက်နေတတ်တာ မေသိတာပေါ့။ ဒါ့ကြောင့် မေ့မင်္ဂလာဆောင်မှာတွေ့ရသော သူအနည်းငယ်ပိန်သွားသည်။ မေ့လိုပဲ အနိုင်ကျင့်ဆိုးနွဲ့တတ်သော ကောင်မလေးနောက်တစ်ယောက်ဆီမှာ သူ ဘယ်လောက်တောင်ပေးဆပ်ခဲ့ရသည်လဲ။ သူမကြာခဏပြောတတ်သော ကုမ်ရာသီဖွားတွေက အချစ်ရေးမှာ အနှောင့်အယှက်အတားအဆီးတွေများတယ်ဟ ဆိုသည့်အသံကို မေ ကြားယောင်နေမိသည်။ စိတ်ခံစားချက်ပြင်းထန်သော၊ မိသားစုအပေါ် သံယောဇဉ်ကြီးသည့် ကုမ်ရာသီဖွားတစ်ယောက်၏ စရိုက်လက္ခဏာတွေအပြည့်နှင့် သူ့ပုံရိပ်လေးတွေသာမြင်ယောင်မိသည်။ အရာရာကို တွယ်ငြိတတ်သလို တခါတရံပြတ်သားမာကြောတတ်သောသူ စိတ်ခံစားမှုကို ဦးစားပေးလွန်းလို့ သူဆုံးရှုံးခဲ့ရတာတွေ ဘယ်လောက်များနေပြီလဲ။ သူအသက်ရှင်စဉ်တုန်းက မေ မမေးမိခဲ့သော စကားတစ်ခွန်းရှိခဲ့သည်။ ဘဝကို တစ်ဖန်ပြန်မွေးဖွားလို့ရမယ်ဆိုရင် ကုမ်ရာသီဖွားတစ်ယောက် အဖြစ်ရော မွေးဖွားချင်သေးလားဆိုသည့် စကားတစ်ခွန်းကိုတော့ မေ မေးချင်မိသည်။ ဒါပေမယ့် ဒါဟာ စိတ်ကူးယဉ်မှုသက်သက်ဖြစ်သွားပြီဆိုတာတော့ မေ ကောင်းကောင်း နားလည်လိုက်ပါပြီ။

          ဘယ်တော့မှ ပြန်မဆုံနိုင်တော့ဟူသော အသိတရားသည် မေ့ရင်ကို ဆူးနင့် ကြေကွဲစေသည်။

ရိုးမြေကျ(7.12.12, 9pm)

Aquarius ရင္ခုန္သံ(၂)

Aquarius ရင္ခုန္သံ(၃)

Aquarius ရင္ခုန္သံဇာတ္သိမ္း