ရပ်နေပေးပါ…

ကျေးဇူးပြုပြီး အဲဒီနေရာမှာပဲ

ရပ်နေပေးပါ….

ငါနဲ့ နီးဖို့မင်းဘက်က တစ်လှမ်းချင်းလျှောက်မလာနိုင်ရင်တောင်

အဲဒီနေရာမှာပဲ

မင်း ရပ်နေပေးပါ…

ငါက မင်းနဲ့နီးဖို့တစ်လှမ်းချင်းလျှောက်လာနေတုန်းမှာ

မင်းက နောက်ဆုတ်သွားရင်

ငါတို့ပိုဝေးသွားမှာပေ့ါ……….

သူငယ်ချင်းဆိုတာ

ငါ ပျော်ရွှင်ပြီး စိတ်ကျေနပ်နေတဲ့အခါ

ငါ့သူငယ်ချင်းတွေက ငါဘယ်သူလဲဆိုတာ သိကြတယ်…

ငါ ပြိုလဲပြီး စိတ်ဓာတ်ကျနေတဲ့အခါမှာတော့

ဘယ်သူကငါ့သူငယ်ချင်းအစစ်ဆိုတာ ငါသိရတယ်…

ငါ မင်းကို လိုအပ်နေတယ်….

ဘယ်သူမှ ငါ့ကြိုးစားမှုကို အသိအမှတ်မပြုလဲ

အရေးမကြီးပါဘူး။

ဘယ်သူမှ ငါ့ဖြစ်တည်မှုကို မလေးစားလဲ

အရေးမကြီးပါဘူး။

စာရွက်ပေါ်က အသိအမှတ်ပြုမှုတွေ ငါ

တကယ်မလိုအပ်ပါဘူး….

မင်းတစ်ယောက်တည်း

အသိအမှတ်ပြုရင်ကို

ငါ ဆက်ရှင်သန်လို့ရပြီ….

လွမ်းခွင့်

တကယ်ပါ

ငါ့နေ့ရက်တွေ အားမာန်အပြည့်နဲ့

ချီတက်နေမိတုန်းက

မင်းကို သတိရတယ်…

အခုငါလေ

အကူအညီတောင်းခံတဲ့ လက်တွေကပဲ

ငါ့နောက်ကျောကို ဓားနဲ့ထိုးသွားတဲ့အခါ

အပြုံးတုတွေကြား

ဟန်ဆောင်စကားတွေကြား

လူးလွန့်ရင်း

ငါမွန်းကြပ်နေလို့

မင်းဆီက

အားပေးစကားလေးကြားခွင့်ပေးပြီး

ငါ့ကို လွမ်းခွင့်လေးထပ်ပေးပါ………….

ပျောက်ဆုံးခြင်း

မျှော်လင့်ချက်လား

ငါနဲ့ အသားမကျတာကြာခဲ့ပေါ့..

ငါ့အတွက်တော့ နတ်ဆိုးတစ်ပါးပဲ..

သေချာရေရာမှု တစ်ခုပိုင်ဆိုင်ထားပေမယ့်

ပန်းတိုင်က ငါ့အတွက် ဝေးဝေးသွားခဲ့တာ….

မြင်းကောင်းခွာလိပ်တဲ့

ဒီစကား ငါ့အတွက်များဖန်တီးခဲ့လေသလား…

ပြေးရင်းနဲ့ ခြေထိုးခံလိုက်ရလို့

လဲကျသွားတဲ့အခါများ

ငါကြားလိုက်ရတဲ့ လက်ခုပ်သံတွေ

မဲ့ပြုံးတွေ

ငါ့ကို မလှောင်ကြပါနဲ့

တကယ်ဆို

ငါ့ကိုယ်ငါ ပြန်ရှာဖွေရင်းနဲ့

အခုထိ ပျောက်ဆုံးနေတုန်းပါ……….