လွဲ

အုတ်ဂူပေါ် နှင်းဆီပန်းစည်းလေးတင်လိုက်မိသည်။

ကျနော် နောင်တတွေ ရနေသည်။ သူငယ်ချင်းဟာ လူ့ဘဝကို လက်လွှတ်ထွက်ခွာသွားခဲ့ပြီ။ ပြင်းထန်စိတ်ကျရောဂါသူခံစားနေရမှန်း သိကြပေမယ့် သူ့ရောဂါကို သက်သာလာပြီဟုသာ လုပ်ဖော်ကိုင်ဖက်အားလုံးက ယုံကြည်နေခဲ့သည်။ antidepressant ဆေးတွေကို နှစ်ချီသောက်ခဲ့ရတော့ စိတ်ကျရောဂါကို သက်သာလာပြီဟု အားလုံးက လွဲမှားစွာ ယူဆခဲ့မိကြသည်။ 

ထိုညနေက သူ ကျနော့်ဆီ ရောက်လာသည်။ အသည်းကွဲလာတယ်လို့ သူ့စကားတွေက ဆိုပြန်သည်။ သူက အိမ်ထောင်သည် ယောကျ်ားတယောက်ကို ချစ်မြတ်နိုးနေမိပြီး ထိုအမျိုးသားကြောင့် အသည်းကွဲနေခြင်း ဖြစ်သည်။ အရက်ခပ်ပြင်းပြင်းကို ရေမရောဘဲ သူတကျိုက်မော့သောက်နေသည်။ သူ့ရောဂါနှင့် မတည့်ဘူးဟု မည်သို့ပင် တားဆီးပေမယ့် လိုက်နာနိုင်ခြင်းမရှိအောင် သူက နာကျင်ကြေကွဲနေသည်။ မျက်ရည်တွင်တွင်ကျနေသော သူ့ကို ကျနော့်စကားတွေကြောင့် သူပိုနာကျင် ခံစားနေခဲ့ရလေမလား။ “ငါက အိန်ဂျယ့်ကို ချစ်နေရုံလေး ချစ်နေတာလေကွာ။ ဒီ့ထက်ဘာမှ မပိုဘူး။ ပိုလို့မရဘူး ဆိုတာလဲ ငါ လက်ခံထားပြီးသား။” ဟု သူကဆိုလာတဲ့အခါ ကျနော်က “မင်းလုပ်နေတာတွေက မင်းဝင်ခွင့်မရှိတဲ့နေရာကို အပြင်ကနေ တုတ်နဲ့ ထိုးနေသလိုပဲကွ။” ဟု ရက်စက်စကားဆိုမိသည်။ သူက “တော်ပါတော့ကွာ။ ငါ့ကို ရက်စက်စကား ထပ်မပြောပါနဲ့တော့။ ဒီညတော့ ငါ့ကို ခဏလွှတ်ထားပေးပါလားကွာ။” အရက်ကို ထပ်ငှဲ့နေရင်း သူက တောင်းပန်စကားဆိုသည်။ ကျနော့်သူငယ်ချင်း နာကျင်ကြေကွဲနေသော မြင်ကွင်းကို ယခုအချိန်ထိ ကျနော့်မျက်လုံးထဲက မထွက်နိုင်ပေ။ “ငါလဲ လိင်တူချင်းမှ ချစ်မြတ်နိုးမိတဲ့သူ မဖြစ်ချင်ဘူးကွ။ အထူးသဖြင့် အိမ်ထောင်သည်ကိုမှ ကြွေမိတဲ့သူ ပိုမဖြစ်ချင်ဘူးကွ။ ကာမေသုဆိုတဲ့ လိုက်နာစောင့်ထိန်းရမယ့် ကျင့်ဝတ်ကို မချိုးဖောက်ချင်ခဲ့ဘူးကွ။ ဒါပေမယ့်ကွာ ငါ့နှလုံးသားက ချစ်ခြင်းမေတ္တာဟာ အရင်ဖြစ်ပေါ်ခဲ့တာလေ။ အိန်ဂျယ့်မှာ မိန်းမရှိမှန်း ငါနောက်မှ သိခဲ့ရတာပါကွာ။ နောက်ပြီး အများအမြင်မှာ ပွဲလယ်တင့်မယ့် ချစ်ခြင်းမေတ္တာမျိုးကိုပဲ လိုချင်တာပေါ့ကွ။ ဆန့်ကျင်ဘက်မိန်းမတယောက်ကို ချစ်မြတ်နိုး အဲဒီအမျိုးသမီးနဲ့ ရွှေလက်တွဲမယ့် ပုံရိပ်ကောင်းမယ့်သူပဲ ဖြစ်ချင်တာပါကွာ။ ငယ်ငယ်ကတည်းက လိင်တူချင်းမှ မေတ္တာသက်ဝင်နိုင်တဲ့သူ ဘာလို့ဖြစ်နေရတာလဲကွာ။ ငါ့သွေးတွေကို ဖောက်ထုတ်ပြစ်လိုက်လို့ ဒီခံစားချက်တွေက ပြောင်းလဲသွားမယ်ဆို ငါဖောက်ထုတ်ပစ်ချင်တာပေါ့ကွာ။ ဂေးတယောက်လို့ လူတွေကဲ့ရဲ့စကားဆိုတာကို ငါခံနိုင်ရည်ရှိပါတယ်။ ခုတော့ ငါအမြတ်နိုးဆုံး အိန်ဂျယ်က ယောကျ်ားချင်း လိင်တူချစ်မြတ်နိုးမှုကို အန်ချင်တယ်တဲ့ကွာ။ လိင်တူချစ်မြတ်နိုးမှုကို ဘယ်တော့မှ လက်ခံနိုင်မှာ မဟုတ်တဲ့ Very Straight တဲ့ကွာ။ ငါက သူနေမကောင်းလို့ သူစားဖို့အတွက် ဖက်ထုပ်ဆီချက်ပို့ပေးတာပါကွာ။ ငါ့ရဲ့ ဂရုစိုက်မှုတွေက သူ့အတွက် ဝန်ထုပ်ဝန်ပိုးတွေတဲ့ကွာ။ ပိုးကြေးပန်းကြေးတဲ့ကွာ။ ငါပေးနေတာတွေကို လက်ခံနေရင် ငါ့အတွက် False Hope ပေးသလို ဖြစ်နေမှာ စိုးလို့တဲ့ကွာ။ False Hope တဲ့။ သိပ်ရယ်ရတယ်။ မျှော်လင့်ချက် မထားပါဘူးလို့ ရိုးသားအပွင့်လင့်ဆုံး ဝန်ခံထားပြီးသားပါကွာ။ ငါ့မှာ အိန်ဂျယ်နဲ့ ပတ်သက်ရင် ဘာမျှော်လင့်ချက်မှ မရှိဘူး။ ငါအမြင့်ဆုံးလိုချင်တပ်မက်မိတဲ့ လောဘက သူ့ရဲ့ အခင်ဆုံး လုပ်ဖော်ကိုင်ဖက်တယောက်ပဲ ဖြစ်ချင်တာကွ။ ဒီလောက်ပဲ။ ဒီလောက်လေးပဲ လိုချင်တပ်မက်မှုရှိတာပါ။ ဒီလောက်လေးပဲ လောဘရှိမိတာပါ။ အိန်ဂျယ်နေမကောင်းရင် ငါကိုယ်တိုင် နေမကောင်းဖြစ်နေသလို ခံစားရတယ်။ အိန်ဂျယ် လုပ်ငန်းခွင်ထဲမှာ အဆင်မပြေရင် ငါကိုယ်တိုင်ဖြစ်နေသလို ခံစားရတယ်။” လို့ မျက်ရည်တွေကြားက သူတုန်ယင်စွာ ရင်ဖွင့်နေသည်။ ကျနော်က သူ့ကို “လွမ်းလို့ သေသွားတဲ့သူမှ မရှိတာကွာ။ မင်း အားရအောင် ငိုပြီးရင် move on လုပ်နိုင်အောင် ကြိုးစားပါတော့။ မင်း ဒီလောက် ပျော့ညံ့တာမျိုး ငါမထင်ခဲ့ဘူး။ ပျော့ညံ့တာမျိုး မြင်လဲမမြင်ချင်ဘူးကွာ။” ဟု ကျနော်က နှစ်သိမ့်စကားဆိုခဲ့သည်။ အခုပြန်တွေးကြည့်တော့ ထိုစကားတွေက နှစ်သိမ့်စကားမှ မဟုတ်ခဲ့တာပဲ။ ကျနော်က ကျနော့်ခံစားချက် ကျနော်ဖြစ်ဖူးတာတွေနှင့် သူ့ကို ဘောင်ခတ်မိခဲ့သည်။ နှစ်သိမ့်တယ်လို့ ထင်ယောင်ထင်မှားဖြစ်စေသည့် ပုံစံနှင့် သူ့ဒဏ်ရာကို ဆွပေးနေခဲ့သည်သာ။ သူငယ်ချင်းရယ် ငါ့ကို ခွင့်လွှတ်ပါကွာ လို့ တိုးတီးစွာ ရေရွတ်မိသည်။ ခွင့်လွှတ်ခိုင်းနေတော့ရော အသက်မဲ့စွာ ရှိနေပြီဖြစ်သော သူငယ်ချင်းအတွက် ဘာအဓိပ္ပာယ်မှ ရှိနိုင်မည် မထင်ပေ။ ကျနော်က သူ့ကို “အချစ်ဟာ အချစ်သန့်သန့်ပဲဆိုရင် နီးခြင်း ဝေးခြင်း ရယူခြင်း ပေးဆပ်ခြင်း ဖွင့်ပြောခြင်း မပြောခြင်း ဘာဆိုဘာမှ သက်ရောက်ခြင်းမရှိဘဲ ဖြစ်တည်နေနိုင်တယ်။” ဟု ပြောပြမိသည်။ သူက ဒေါသတကြီးဖြင့် “ဟိတ်ကောင် စောက်ရူး။ မင်းပြောနေတာတွေက သောတပန်တွေ အနာဂမ်တွေရဲ့ ချစ်ခြင်းမေတ္တာတွေလား။ ဥပက္ခောပြုနိုင်ခြင်းတွေလား။ ငါက ပုထုဇဉ်ကွ။ ငါကိုက စိတ်ကျရောဂါကြောင့် စိတ်မထိန်းနိုင်ဘဲ အိန်ဂျယ့်ကို ချစ်တယ်လို့ ဖွင့်ပြောမိသွားတာ။ ငါသာ ဖွင့်မပြောခဲ့ရင် ဘယ်သူမှ ကဲ့ရဲ့စကားမဆိုနိုင်ဘဲ ငါဟာ သူ့ရဲ့ လုပ်ဖော်ကိုင်ဖက်တဦးအနေနဲ့ ရှိနေမှာပဲ။” ဟု နောင်တသံစွက်ပြီး ကြေကြေကွဲကွဲ ပြောနေသည်။ ကျနော်က “ မင်း ဖွင့်ပြောပြော မပြောပြော မင်းရဲ့ အပြုအမူတွေက ဒီလိုပဲ လုပ်ခဲ့မှာပဲ။ ပေးချင်တာတွေ ပေးခဲ့မှာပဲလေ။ အဲတာက cheesy ဖြစ်တယ်လို့ သူမင်းကို စွပ်စွဲတာလို့ ထင်ရတာပဲ။” ဟု ဆိုမိသည်။ သူငယ်ချင်းက “အေး အိန်ဂျယ်မလိုချင်တာတွေ ငါ မပေးတော့ဘူးကွာ။ ရပြီမလား။ အဓိကက အိန်ဂျယ့်ကို ပေးနေလို့ အပြစ်ဖြစ်နေတာမလား။ လူတွေက ဒါကို ချည်နှောင်တယ်လို့ ထင်နေတာမလား။” ဟု နင့်နဲစွာ ပြန်ပြောသည်။

ထိုညက အရက်တွေမူးအောင် သောက်ပြီး သူငယ်ချင်းဒဏ်ရာတွေ သက်သာသွားပြီး ရှေ့ဆက်နိုင်လိမ့်မည်ဟု ကျနော်က မိုက်မဲစွာ ယုံကြည်နေမိခဲ့တာ။ မှားယွင်းသွားလိုက်တာ။ အဲဒီနောက်ပိုင်း ပျော်ရွှင်ခြင်းကင်းမဲ့နေသော သူ့ကို ရံဖန်ရံခါတွေ့ရတတ်သည်။ ရည်မှန်းချက်ကင်းမဲ့နေသလို အသက်မဲ့စွာ လှုပ်ရှားနေတဲ့ သူ့ပုံရိပ်တွေကို မြင်ယောင်နေမိသည်။ ဒီလိုနဲ့ သူနဲ့ မတွေ့တာ သုံးလေးလလောက်ကြာသွားသည်။ သူ့သတင်းကြားရချိန်ကျတော့ လက်သင့်မခံနိုင်သော သတင်းဆိုးဖြစ်နေသည်သာ။ သူက ညစဉ်ရက်စက်အိပ် မပျော်တာများခြင်းနှင့် ရင်ဆိုင်နေခဲ့ရသည်တဲ့။ ခံနိုင်ရည်မရှိတဲ့အဆုံးမှာ အိပ်ဆေးတွေ overdose လုပ်ပြီး နေ့ရက်တွေကို ဆက်လက်ရင်ဆိုင်ခြင်း မပြုတော့ခြင်းကို ရွေးချယ်သွားခဲ့သည်။

လွမ်းလို့ သေသွားတဲ့သူတော့ မရှိပေမယ့် လွမ်းလွန်းလို့ ရှေ့မဆက်နိုင်ခြင်းများ ရှိပါသည်။

ရိုးမြေကျ (မုံရွာ)

04.06.2024 (05:46AM)

Pride Month မို့ အမှတ်တရ ရေးဖွဲ့ပါသည်။ စော်ကားခံရခြင်းကင်းသော ချစ်ခြင်းမေတ္တာများ ပိုင်ဆိုင်နိုင်ကြပါစေ။